Home ارشاد اسرى الحب وسنينه .

الحب وسنينه .

الحب وسنينه .
0
0

 ⁠⁠⁠الحب وسنينه. …

الاخصائى /ريهام ابو سنه

عنوان ويافطه بيقف تحتها ناس كتير، الحب والتعلق بشخص ما..والارتباط بدون إعمال العقل أو تجاهل الأسباب المناسبه للحب والارتباط دا .يعني اختيار مش مناسب، مش كل الاختيارات في حياتنا بتتحط تحت بند صح أو غلط ….. لأ. .أحيانا بيكون اختيار مش مناسب …ناقصه حاجه. .فيه جزء في العلاقه دي فيه مشكله وبيتغاضى الطرفين ويندمجوا متجاهلين العيوب والمساوئء ومبسوطين بحالة الحب والاهتمام المزيف – لأنه من غير مسؤوليه حقيقيه- الكلام سهل ومش مكلف خالص…. دا بيبقى قصور من الطرفين في فهم يعني ايه علاقه ارتباط بين اتنين مهم انهم يتقاسموا المسؤولية للحياة بينهم في إطار شرعي -يعني في النور بما يرضي الله وبعلم ومباركة الاهل – وكل طرف له واجبات وعليه مسؤوليات وفي تبادل مشاعر ..وهنا خط أحمر عريض…
لأسباب قدرية أو أسباب اجتماعيه، بيحصل خلل والارتباط يفشل وتبدأ مشاعر الألم والفقد والخذلان والدخول في دايرة صعبه ورفض ضمني لفكرة أن الطرف التاني مشي أو خلص من واقع الآخر. .. غالبا بيحصل التلصص من حد منهم على صفحة التاني وممكن يعيد شريط الذكريات ودا أمر طبيعي وممكن يطلع البوم الصور اللي بينهم. ..الخ… وقصة العذاب النفسي تبتدي. … ليه دا بيحصل ؟؟ ودا المهم علشان الحل يكون أسهل في التنفيذ. … في الحب بيحصل نوع من التعود للدماغ يعني كيمياء الدماغ بتتغير مع وجود الحبيب، ما تستغربوش لما تسمعوا جملة بين اتنين بيحبوا بعض “انت بتمشي ف دمي”..الحقيقه انه فعلا الكيمياء بتخرج في الدماغ اوكسيتوسين، ودوبامين، مع السيراتونين ودي هرمونات السعاده واللذه. ..دماغنا بيتعود على طلبها من “الحبيب” في مشاعر “الشوق” خصوصا مع غيابه أو فشل العلاقه لأن اللي بيحصل حاجه شبه الإدمان كدا. .. الدماغ مفتقد سبب خروج الهرمونات دي …
أول خطوة للعلاج
البلوك الكامل لأي وسيلة اتصال أو أي مواقع تواصل من كل مصدر له في حياتك وأي صورة او خيط مهما كان بسيط يتقطع فورا -ألم بألم بس ينتهي- دي أهم خطوة في التعافي العاطفي وأهم خطوة وملهاش بديل على فكرة والا يكون الشخص بيتحايل على نفسه وبيخدعها وبيسبب لها مزيد من الألم …ومع الوقت الكيمياء حتتزبط ويتعاد تأهيلها والشوق حيتحول لحنين هادي لطيف وتبقى زي حدوته قديمه حصلت لك بس معادتش توجعك وجرح واتقفل وخلاص …. ودخلت دايرة الوعي والاتزان النفسي من جديد
مفيش حاجه اسمها حب سرمدي
ولا في حد يتخيل ويصدق أن سعادته مرهونه بمزاج وحالة ورضى شخص آخر
وسع دايرة الاهتمامات والأصدقاء..ممارسة الرياضه. .شغل دؤوب. ..قراية. ..دفي قلبك باسرتك وحبايبك اللي بيسدوا فعلا خانه الفراغ جواك… جرعات روحانيه قوية وعلاقة مع الله سبحانه وتعالى حتساعدك على الاستشفاء الذاتي….
التعافي أوله مجهود وتعب …وآخره سلامه ومعافاه
الحياة مش بتقف عند شخص
والسعادة حاله…احنا اللي بنوجدها ونعيشها
خلوا حياتكم قصة حلوة تعرفوا تعيشوها بأمان وتقدروا تحكوها وانتوا مرتاحين
تحياتي لكل قلب تعافى من جديد

<!-- This website is like a Rocket, isn't it? Performance optimized by WP Rocket. Learn more: https://wp-rocket.me - Debug: cached@1550481972 -->