Home ارشاد اسرى لماذا نلوم انفسنا ؟

لماذا نلوم انفسنا ؟

لماذا نلوم انفسنا ؟
0
0

ياريت اللي جرى ..ما كااان !!!!!!

الاخصائى /ريهام ابو سنه 

عارفين الناس اللي في وقت بنحس أننا منقدرش نعيش من غيرهم أو تستغني عنهم ..
الناس اللي بتتبرمج حياتنا عليهم والساعة تتزبط عليهم
اللي مكانش ينفع ننام قبل ما نطمن انهم بخير وأول منصحى نجري نقول اليوم حيبدأ بهم ولهم …
الناس اللي بنحاول نعمل كل حاجة حلوة علشان يرضوا ويكونوا سعداء ومبسوطين لمجرد ان سعادتهم بتفرحنا
الناس اللي كانوا لما نشوفهم النبض يزيد ونحمل هم الوقت اللي قرب يخلص
اللي الوقت معاهم كان طاير ومش محسوب
الناس اللي بنقيس جمال كل حاجة حوالينا على ذوقهم وجمالها في عينهم
وفجأة تحصل لحظة قدرية ….مشكلة او وعكة اجتماعية او صحية ..المهم في نقطة بتتكعبل فيها …..و هبااااا …متلاقيهمش !!!!
ساعتها الالم والحزن والتعب بيبدأ ياخد علينا ويعيش فينا
طب ليه ؟؟؟؟
مش احنا اللي اخترنا اننا نعمل ده طول الوقت علشان ننول لحظة رضا واهتمام او حب وفاكرين انه ده دورنا وهي دي واجباتنا ؟؟
كنا راضيين منسمعش كلمة شكرا ، أو وأنا كمان عايز اسعدك ، واعمل ايه علشان ارضيك؟؟ كنا راضيين يقصروا في اللي مفروض عليهم ونقبل ونعدي ونتغاضى عن تقصيرهم ..وممكن كمان نسد مكانهم ونلعب دورنا ، ودورهم …لأ وإيييييييه بنعمل الدورين صح أوي وبضمير كمان
كنا بنشتغل على نفسنا ومعطلين دور الناحية التانيه وكأن العلاقة دي بكلم فيها نفسي ..او ببني فيها ليا لوحدي، وعايز اعدي البر التاني وشايل الطرف التاني على ايدي وأقول لنفسي “يلا مش مهم مين يعمل ،المهم نكون مع بعض “، الحياة لازم تمشي ومش لازم تقف ” …ومفيش أسرع منك يا أياااااام
…لكن لأ .. كنت شايل على ضهرك لحد ما بقا حمل تقيل …متعب بياخد مجهود مرهق ويستهلكنا لحد ما نبدأ بعد وقت طويييييل نحس انه غلط ونطلب حق المشاركة ونقول يلا بقا الحياه هات وخد ، وكل واحد يعمل اللي عليه ..
بس المفاجأة لناس كتيييير …
إنه الطرف التاني بينكر عليك الحق ده …..تخيل …اه …بينكره ….لأ … ده كمان ممكن يعنفك ويقسى عليك ويشوفك انت اللي اتغيرت ويتهمك باللاحب او اللامبالاه او انك زهقت وبتتلكك…وتسمع ردود لها العجب وتتصدم ..وتدخل في حالة البكاء واللامعقول وازاي بعد كل ده الاقي الرد ده ..انا عملت وعملت وخليت وسويت واتنازلت واتظلمت وانداس عليا وحقوقي وقعت مني ادامي في السكة ..وبعد ده كله يكون ده الرد ؟؟؟؟ انا استاهل كده ؟؟؟ده انا نسيت نفسي وسعادتي وعشت بقلب واحد يسع دنيتكم بحالها….الحقيقه انه فعلا ده كله حصل واتعمل…
لكن في سؤال ؟؟
مين طلب منك تعمل كده
مين قالك لو اتنازلت في أي علاقة حتتحب أو حتبقا مثالي
مين قالك انك لو لعبت دور البطولة في المسرحية كلها لوحدك …حتتشاف اصلا
مين قالك انك حتلاقي الاهتمام أو الطبطبه والشكر حتى
مين قالك تعمل الواجب والمستحب والمكروه عشان حتنول الرضا
محدش …كلها اجتهادات في الغير مقبول ومش طبيعية ..وقدمت نفسي بطل بتلاتين لون …قلت للي أدامي ” هيت لك “… والرفض اكيييييد حيكون الرد ..وده أشكاله كتير؛ وعلى فكره هو غالبا مكانش بيبقا موجود كمان – حاضر وغايب – ..السبب ببساطة انك كنت بتصد طول الوقت وبتلعب بكفاءة والخانات كلها متقفله صح ….
بلاش نبدأ حدوته ومنعرفش نكملها صح أو على الأقل بدون مخاطر ..خليها حدوته تعرف تعيشها… وتقدر تحكيها…. وتكون مفهومه
بلاش نجني على نفسنا بنفسنا ونطمع اللي حوالينا فينا ونرجع نقول يا ريت اللي جرى ..ما كااان
كل أطراف العلاقة ..أي علاقة ..لازم يشتغلوا على نجاحها واستقرارها وكل طرف يقوم باللي عليه ..ويبقى عارف لو عمل للطرف التاني حاجة ف ده مش دوري بس انا حساعد المره دي وهو يكمل دوره، الحياة مبتبقاش حياة لو معرفناش نعدي جواها مرتاحين وحاسين بسلام نفسي وراحه ورحمه ورضا وسعاده …
مش صعبه على فكره لو وقفت شوية حتلاقي أن اللي عمل كل التضحيات دي ممكن جدا يطلع من طاقة الحب اللي جواه ويحاول يبني ويصلح من جديد أو حتى يبدأ من جديد….
محدش بيفضل واقف مكانه …هي حياتنا كده ومفيش أسرع من الأيام
نبدأ ونفكر ونصلح ونحاول واكيييييييد حنوصل..

 

<!-- This website is like a Rocket, isn't it? Performance optimized by WP Rocket. Learn more: https://wp-rocket.me -->