Home ارشاد اسرى كيف تكوني أم حازمة ؟

كيف تكوني أم حازمة ؟

كيف تكوني أم حازمة ؟
0
0

 ⁠⁠⁠يعني ايه اكون أم حازمه؟؟

الاخصائى / دعاء اليمنى

كتير من الامهات بتقول :

  • نفسي اكون ام ليها شخصيه.
  • نفسي ولادي يعملولي حساب.
  • نفسي ولادي يفرق معاهم زعلي.
  • نفسي ولادي يهتموا برأي وينصتوا لي.

تقريبا كل حالات تعديل السلوك اللي بتجيلي وخصوصا في سن المراهقه بتكون ديه امنياتهم.

بس نبتدي الاول بشرح بسيط لكلمه حزم و ايه الفرق بين الحزم والشده في تربية اولادي….

اولا الشده:

 هي صراخي وعصبيتي وشتايم وبهدله وصوت عالي واحيانا ضرب …..ديه شده ويارتها بتكمل كدا للاسف تنزل علي مفيش….

بعد ما اقسم واحلف واصرخ ممكن ارجع في كل ده وده بنطلق عليه عصبية الموقف وليس المبدأ.

بمعني…..ان ممكن يتكرر نفس الموقف بنفس السيناريو بس مودي رايق ومفيش حاجه مزعلاني اخده بهدوء واوافق علي اللي رفضته امبارح مثلا….

ديه اسمها شده او تذبذب في التربية وحسب حالتي النفسيه……وده غلط معظمنا بيقع فيه

ثانيا الحزم :

هو الثبات علي الموقف بدون عصبيه واستخدام ألفاظ وضرب وما شبه.

مثال ……

-ماما انا عاوز شيكولاته دلوقتي…..
-لا ياحبيبي بعد الغدا…..
-عياط وترفيص ودبدبه …..لا هاخد يعني هاخد
-مش هينفع حبيبي بعد الغدا …..
-طيب مش هتغدي…..
-براحتك لما تعوز تاكل قولي وبعدها خد شكولاته
-عياط وانهيار …….وساعات يغلط ويعمل مشاكل….
انا ثابته وهاديه
-طيب ماما انا أسف علي الغلطات بتاعتي ….
-خلاص حبيبي سامحتك….
-ممكن اخد شكولاته…..
-لا حبيبي بعد الاكل……

ده حزم انا في كل وقت وتصعيد ومحايله ثابته وموقفي واحد .

قيسي علي ده كل حاجه بينك وبين ولادك

كدا انا بتفادي في المراهقه التمرد والعناد والصلابه والتطاول بشكل كبير وليس نهائي.

كأني بأهل ولادي من اول يوم علي نوع من التعامل الوقائي يحميني ويحميهم من التصادم

ابعدي عن الصراخ لانه ضعف
ابعدي عن العصبيه والبكاء لانها حيلة الضعيف
ابعدي عن التهديد والتصعيد في امور مش هتقومي بيها اصلا لانك هتفقدي هيبتك
ابعدي عن جملة(لما بابا يجي هقوله في التفهه والكبيره)
خلي ليكي هيبه وشخصيه ثابته قوية وليس مهزوزه عنيفه ومحتاجه دايما لمساعده

الولاد فهمنا اوي وحافظين وعارفين منين يدخلوا لينا وايه بيعاندك ويعملوا…….

خليكي اقوي بشخصيتك الثابته اللي مش كل شويه بحال ورأي

التربية شىء ليس بالسهل ……
والجنه محفوفه بالمكاره ….

اللهم بارك لنا في اولادنا….
واستجب اللهم فيهم دعائنا…..

 

<!-- This website is like a Rocket, isn't it? Performance optimized by WP Rocket. Learn more: https://wp-rocket.me -->