Home منوع ما هي أساسيات التخاطب وماذا تعني كلمة تخاطب ؟

ما هي أساسيات التخاطب وماذا تعني كلمة تخاطب ؟

ما هي أساسيات التخاطب وماذا تعني كلمة تخاطب ؟
0
0

هنتكلم عن اساسيات التخاطب و يعني ايه تخاطب ؟؟ امتي اقول ان الطفل محتاج جلسات تخاطب او عنده مشكلة ؟؟

التخاطب معناه التواصل وهو ده الهدف الاساسي منه ان الطفل يتواصل مع البيئة اللي حواليه

طيب ايه نوع التواصل ده ؟؟

  • تواصل لفظي : اللي هو الكلام ان الطفل بيستخدم جمل واضحة وسليمة يعبر بيها عن احتياجاته و يتواصل بيها مع غيره
  • التواصل الغير لفظي : اللي هو تعبيرات الوجه (الفرح – الحزن – الغضب -…….) و الإشارات ( باي – لأ………)

يبقي اقدر اقول ان التخاطب هو وسيلة بتمكني من التواصل مع الاشخاص وتبادل معلومات سواء بكلام منطوق او ب إشارات

طب انا محتاج ايه عشان اتكلم او اتواصل ؟؟؟

  • اللغة : كل بلد ليها لغة معينة بتتواصل بيها ( العربية – الانجليزية…..)
  • الكلام : المخ بيترجم الإشارات ده بيحصل من خلال أعضاء النطق اللي بتشكل الاشارات و الرموز في صورة كلام و عشان الكلام ده يخرج يبقي محتاج ل صوت
  • الصوت : بيكون صادر من الحنجرة نتيجة مرور الهواء فيها ونتيجة سماع وترجمة الاشارات والرموز المتخزنة ف المخ

** يعني الكلام اللي بيخرج بيكون معتمد علي اللغة المتخزنة ف المخ في هيئة إشارات ورموز بيبدأ المخ يترجمها و يدي إشارات لاعضاء النطق عشان تخرج في صورة اصوات

لو في مشاكل ف اي نقطة من دول هنا ممكن تأثر علي كلام الطفل و تأخر من النمو اللغوي عنده

مشاكل اللغة :

  • الطفل مولود ب مشكلة مثل : ضعف السمع – تأخر عقلي – متلازمات(داون….) – مشاكل ف المخ (شلل دماغي – صرع – كهرباء زيادة – ربط اللسان…..) أحياناً فرط الحركة وتشتت الانتباه تكون من اسباب تأخر النمو اللغوي وكمان بتأثر علي جانب التعليم.
  • الطفل معندوش اي مشكلة عضوية لكن برضو متأخر في الكلام ومش بيتكلم زي الاطفال اللي في سنه ده بيكون نتيجة للبيئة اللي الطفل عايش فيها واللي مش بتساعد الطفل علي انه يستخدم اللغة سواء استقبالية (تخزين الكلام) او تعبيرية(تكوين الجمل واستخدامها) هنا بنقول ان الطفل عنده تاخر في الكلام نتيجة فقر بيئي او حرمان بيئي.
  • أحيانا بيحصل تدهور للغة نتيجة حادثة او مرض يعني شخص كان بيتكلم طبيعي حصلتله حادثة أدت ل عدم قدرته علي الكلام او الكلام بقي بيخرج بصعوبة

مشاكل الكلام :

اللدغة – الخنف – التلعثم بأنواعه – الحبسة الكلامية (بتكون نتيجة إعاقة حركية في جهاز النطق)

مشاكل الصوت :

البحة الصوتية مش بتأثر علي الكلام لكن بتأثر علي مخارج بعض الاصوات بالتالي ممكن تعمل مشكلة

احنا بنتكلم منين؟؟

احنا بنتكلم عن طريق المخ اللي بيقوم بترجمة الإشارات والرموز اللي داخلة فبيبدأ ب إرسال إشارات لاعضاء النطق عشان تخرج الإشارات دي في صورة اصوات و كلام مفهوم من خلال المعلومات المخزنة من اللغة

الطفل عشان يتكلم بيبقي محتاج إيه؟؟

  • يكون بيسمع كويس
  • يكون فاهم الكلام وبالتالي ذكاؤه طبيعي
  • بيئة بتساعد الطفل علي اكتساب اللغة
  • اعضاء النطق سليمة
  • مفيش مشاكل ف المخ

لو الطفل عنده مشكلة ف اي نقطة من دول يبقي هيحصل عنده تاخر في النمو اللغوي واكتساب اللغة بشكل طبيعي هنا الطفل بيبقي محتاج لتدخل من المتخصصين و التدخل بيكون علي حسب حاجة الطفل

و ده اللي هنتكلم عليه المرة الجاية ان شاء الله

إعداد :

سوزي هشام الصافي

أخصائية تخاطب وتواصل وعلاج امراض النطق والكلام

<!-- This website is like a Rocket, isn't it? Performance optimized by WP Rocket. Learn more: https://wp-rocket.me - Debug: cached@1603798386 -->